الشمس اللي نازلة
تنشف
عرق الفلاح ف كمها
ماكنتشى نازلة لله وللوطن
كان نفسها يلم شعاعها ف ديل جلابيته
******************
دمعه العشق اللى رغرغت شوق وحنين
كات اخر دمعه ف عين الشمس
واما وصلت كبد السما
وقعت الدمعه اليتيمة ف حجرالارض
وفضلت تكوى كل اللى يمشى عليها
ما كانش حد مفكر
ان فيه للشمس دمع
******************
الحلم ماستحملشى صهد الشمس طار
وساب جناحات الامل ع الارض
عيون الصبية المستحية
اللى تشبه الجمار
متنفخة م السهر
زى ثمار البرتقال ابو صرة
كان نفسها تاخد جناحات الامل وتطير
بس للاسف كانو مكسورين
*******************
شد سرج الفرسة وطلع يجرى
ف اخر طريق الحب ترعة
على الضافة التانية صفصافة
حبت تعدى الترعة بيه
رفض يعديبها
اصرت تعدى وترميه يغرق
ودا جزات اللى يعشق ركوب الخيل
وهو مش خيال
السبت 5 مايو 2018 - 0:42 من طرف كايرو تريد
