الملايكه بيسألوها

أول مشاركاتى

الملايكه بيسألوها
ـــــــــــــــــــ
ألا ليه دموع عنيا محبوسة جوايا
ومابشوفش غير إنى عايز أرجع كل السنين
ما أنا أتعلمت من الحنين
والضيقة وقلة البخت وكتر النواح
كل درس والتانى ع اللى راح
مش هاتصدق لو شافتنى غرقان فى بحر من الجراح
مش هاتصدق إن دعاها ليا ماحققليش اللى نفسى فيه
سامع صوتها والملايكه بيسألوها .. تعرفيه؟
قولى لهم ده اللى حطيت شقايا العمر فيه
قولى لهم الكلام الحلو اللى كنتى بتقوليه من ورايا
قولي لهم زى ماكنتى بتقوليلى ياضنايا
سيبته وأنا عارفه أنه جاى ورايا والملايكه مصدقين.
قولى لهم ولو شفاعة
ما أحنا فى الدنيا محتاجين
وأبنك بقى واحد م المظلومين
ماشافش والى بيصحى فى ضميره دين.
ماشافش عدل يفتح بيباننا المقفولين
ماشافش حل يحل كرب المحرومين
وأدينى أتحرمت منك
يعنى كان لازم تقوليلى روح
إلهى مايفرق بينا موت
عارفه ياأما الكون دا ضيق
مهما ترمح عينى فى براحُه
بأشوف الدنيا قد الكف
عامله راسى حوايا .. ودف
مفيش حمل على أبنك خف
من بعد مانبع حنانك جف
كتبتيلى وقريتى عمرى
ولا المتعلمين فى مدارس
وأنا اللى طلعت عبيط دلوقتى
كنت فى غفله ومش حاسس
أخلع وسخ وألبس نضيف
أرمح وأبعتر ماكنتش ضعيف
أرمى روحى ورا أى طيش
وأرجعلك وقلبك بيقول يالطيف
شفتى قد أيه دلوقتى أبنك ضعيف؟
شفتي قد أيه الحال يغُم ؟ يا أحن أم ...
مش هاأبطل أدعيلك وأنا اللى محتاج دعاكى
وحياة حنيني لـ لحظة واحدة من لوقاكى
ما هابطل أدعيلك .
ــــــــــــــــ
محمدأسامة

الشاعر الاريب الحبيب محمد اسامة وحضور اضاء جوانب المنتدى
بكل الحب والتحية اهلا بك معنا هنا
فرحنا بك كما استمتعنا بابداعك الجميل الدى يسكن القلوب مباشرة

محبتى وتقديرى لك

د. فوزى أبودنيا كتب:: الشاعر الاريب الحبيب محمد اسامة وحضور اضاء جوانب المنتدى
بكل الحب والتحية اهلا بك معنا هنا
فرحنا بك كما استمتعنا بابداعك الجميل الدى يسكن القلوب مباشرة

محبتى وتقديرى لك

ربنا يبارك فى حضرتك يادكتور

والله العظيم واحشنى
وطبعاً أنا قلت لحضرتك أن القلوب عند بعضها
ونفسى كل يوم ألتقى بحضرتك وعلشان تصدق اعمل زيارة لموقع الرابطة وتشوف قد إيه إنك فى بالى على طول

اشكرك على هذه المداخلة الرقيقة
مع دعواتى بالصحة والستر
أخيك
محمدأسامة