القرموط
اللى كان بيتقرمط على القراميط
كل يوم ياخد البحر
عرض وطول رقص زى الدولفين
يتباهى انه نزع (ميت الف) طعم من السنانير
من غير مايشبك فى سنارة واحدة
وانه لف بحور الكون
عيون الشبك لم عرفت تشوفه
وان كل مراكب الصيد
كات بتوسعله السكة يعدى
وتضربله سارينه البحرية احتفاء بيه
وهو رافع زعنفة ديلة على راسه عامل قبطان
تملى كان بيتباهى انه طلع من المياه
سلم على الصياد ورجع تانى
وان فيه بنت انسية بتعشقه
وفيوم شاورت له وهو بيلعب ع الشط
وقالت له
نفسها يبقالها منه قراميط صغيرين
الواد الصغير اللى كان بيتعلم الصيد
شد السنارة
وفيها القرموط المتقرمط
وهو بالع الطعم ع الاخر
قراميط البحور كلها
وقفت تتفرج عليه
وهو طالع يرقص
الرقصة الاخيرة ف السنارة
بيبكى ويقول
اخر رقص القرموط صيده
السبت 5 مايو 2018 - 0:42 من طرف كايرو تريد
